Wednesday, December 8, 2010

Ensera Nembiak:Jerita tekura, pelanduk enggau nyumbuh nanam pisang...


Ensera Nembiak:
Jerita tekura, pelanduk enggau nyumbuh….

Di kampung jerung, nadai didinga munyi kensung nyumbuh tunggal, diak meh endur menua bala sida jelu diau, begigak ke pemakai, engga beranak betelesak. Mayuh macam bansa jelu ke ngibun menua nyak, bisi nya jelu bjelangkit, jelu ngerap, jelu bejalai meh nyak… enggau mayuh gik bansa jelu ke bukai. Tang dalam jerita tu aku mina ka ngenag tiga iku bansa jelu ia ka ti bisi nguan menua nyak. Ianyak tekura (ambai kumang /akan), pelanduk(samba) enggau nyumbuh(mbuh/nyumbuh). Kenok ko jerita sida inik aku tiga iku jelu tu nang sigi sekaban ari mula ia, semua pengawa dikereja sidak begulai.
Nitih ke jerita tuai kelia tekura tu bulih nama ia ambai kumang laban ia ke bisi ati ngagai kumang, uji kita enti maya munuh tekura bak aku… sebut kita “ambai kumang 2x” enda kekasak gik ia… kok jerita lah… hehehehehe. Pulai baru kitai ngagai jerita ke deka di kunsi ke aku enggau kita tadi, nyadi nama menua ke endur bala jelu nyak diau dikanggau ke urang bak menua nyak kampung pulau buah. Ngemai urang meri nama nyak kampung pulau buah laban mayuh macam bansa buah ke bisi bak kampung nyak, nyak alai kampung nyak bisi diuan mayuh macam bansa jelu laban buah aba kampung nyak meh ke dipakai bala jelu nyak.

Pengudah ke udah lama bala jelu ke nguan kampung pulau buah nyak, diak deh buah ke bebuah nyau majak kusut tetiap taun, laban diak aja ke bc endur bala sida jelu ke begigak ke pemakai. Peda taun siti bkurang gik gak buah diak mansut ke buah, pkara tu ukai semina setau aja ke nyadi tang meh btaun-taun. Balat irau mat ati gak bala jelu ke nguan menua nyak. Meda utai ke bansa nyak, diak deh tekura seduai pelanduk ngagau ke nyumbuh ngasuh nesau bala jelu ke bukai baum betanam kebuah. “ akan!!!... “ ko pelanduk ngagau ke tekura. “ nama utai nyak sambi …?” ko saut tekura gak…. “uji peda nuan akan… taun beganti taun, buah di menua kitai tu tak nyau majak kusut, enti perkara tu majak nyadi nama meh pemakai ke dipajuh bala ucu icit kitai ila…” ko pelanduk madah ke tekura. “ bak ia sambi…. aku pan nyau irau amat ati meda pkara tu…” saut tkura.
Sepengudah lama seduai ke berandau…. Diak deh datai bakih seduai ia nyumbuh nurun ari pucuk tapang. Datai diak… tak alu nyapa urang empu… “apuu….. bendar mat sduai dik kih ke berandau… nyau didinga ari bukit seberai munyi nyawa seduai dik…” ko nyumbuh nyapa seduai ke benung nurun ari pucuk tapang alu nuju ngelawa seduai ke benung dugau2 bak ujung tanju nyak. Udah nyak planduk pan aku nusi utai ke dikerandau seduai ia ngagai nyumbuh… nyumbuh laban ke ka agu2 pendiau… tak semina ngaru pala ajak mending ke jaku planduk.
Sepengelama sida tiga ke bejurai ke penemu diak, diak deh tekura alu bulih akal. “ nyadi sambi, mbuh…. Bak penemu aku… manah gik kitai tiga mai bansa jelu ke bukai begaga ke kebun buah diri empu, enggik sapa ke dulu abis, abis meh…. Anang ngining pangan diri…” piak ko runding tudah tekura. “ apuu…. Manah mat meh buah penemu dik nyak deh akan…. Aku setuju mat enggau penemu dik nyak…..” ko pelanduk nimbal jaku bakih ia tekura tadi. “Bah….. dini kitai ka bulih tambak buah nyak deh….? Ukai nyak semaya ke endur ia mansut kebuah… “ ko nyumbuh gak….. nyadi nyumbuh tu kenok ko jerita… enda entu pintar igak gak tudah nyumbuh tub c ka agu2 mimit. “ Nyak nyamai dirunding nyak unggal mbuh…. Nyin… bak bukit sengkabang bak menua mensia din… mayuh amat ar… buah ke tumu bebuah bisi 4 bulan tau ke 6 bulan udah bebuah buah nyak...” Ko pelanduk nyaut nyumbuh. Nyak meh tudah nyumbuh nyau ngasuh balat gik ia ngaru pala laban ke enda kala meda serta ningga buah ke ngemu nyak bebuah, nyau gisai-gisai meh tudah nyumbuh nyak tadi ke benung duduk bak ungkap tanju planduk seduai tekura.
Nyadi buah ke tumu bebuah ko pelanduk nyak tadi… buah pisang… nemu kitak….pisang ukai nyak lama endur ia mansut kebuah… enti pisang ke galak enda sampat 4 bulan alu bebuah ia. “ooo….. piak ia ney….” Ko saut nyumbuh gak…. Ari pan nyau lemai, laban ke deka baum ko jaku.. diak deh tekura aku ngasuh nyumbuh bepadah betuggung bak ruai ia diak malam nyak. Nama deh… laban ke sigi rajin kenok ko jaku… alu berayun tetayun meh tudah nyumbuh sebelah pun kayu nuju rumah siku2 madah ke ngasuh betuggung bak ruai tekura… nyau abis tingkal dan kayu ke memesai lenggan endur nyumbuh bepaut. Kering nyumbuh tu kenok ko jerita. Udah nyak peda datai meh bala jelu ngejung ruai tkura seduai pelanduk. Sepengudah semua jelu kebisi nguan menua kampung pulau buah nyak datai tekura aku mansut ke tuju utai ke deka dikerandau ke sida.Nama deh… nyau baka api ke ditanjah aim eh tudah bala jelu ningga jaku tekura nyak. Kepenudi randau sida… nama deh…. Setuju magang meh bala jelu diak enggau penemu tekura nyak. Udah nyak bala jelu pan alu mulai Kediri.
Ngerebak meh mata panas ari dibungkul petang malam, tekura pan alu dani ngerak pelanduk ke bilik sepiak. Nyau agi dederut gak kuruh tudah pelanduk tu… nyau munyi bakal sekunyil ka bekejang munyi kuruh pelanduk. Udah nyak tekura pan alu ngerak nyumbuh kebenung tinduk jenak bak pucuk tapang din... tak tekenyit manah tudah nyumbuh laban tekura. Udah nyak sida tiga pan aku nyedia Kediri laban ke ka agi menua mensia bak bukit sengkabang. Mayuh meh perangka ke dibai sida. Nyadi kenok ko jerita …tuju sida tiga tu ke menua mensia di bukit sengkabang laban ke deka encuri tambak pisang di menua nyak. Udah makai pagi nyak… sida tiga pan alu nurun, ngejang nuju menua bukit sengkabang. Jauh arr… menua bukit sengkabang nyak kenok ko jerita bisi sari semalam bejalai nyak baru datai din.
Sungai abis disemerai, bukit ambis ditiki, emperan abis dilawa tak nadai enda utai ke ditujah sida tiga tu ngelawa menua bukit sengkabang nyak. Laban sigi ke berani, kering serta tegal tulang enda lama endur sida tiga datai bak menua bukit sengkabang. Ari pan nyau lemai kira nyau ke padam meh matapanas maya nyak… sida tiga pan aku nuntung datai bak tucung bukit sengkabang. Dinga deh… nyawa bala anak mensia nyau beterauh meri utai tupi sida makai piak gak nyawa bala anak mit ke mandi bak sepiak ungkap batu enda entu jauh ari sida tiga ke ngetu. Nyumbuh pan aku niki pun engkabang ngambi dan engkabang dikena begaga ke langkau endur sida ia ngenduh malam nyak. Tekura seduai pelanduk laban ke enda nemu niki tak semina ngumpul ranggas kayu ke mati sebelah tanah nyak dikena sida ia tiga ngidup ke unggun. Ari pan nyau gak malam, udah makai… sida tiga pan alu tinduk mejam ke mata nganti ari ke tawas.
Kenok ko jerita menua mensia enggau bukit sengkabang tu enda entu juah igak… nyadi menua tu bak baruh bukit din…. bak emperan. Bak ia didinga nyawa mensia ari endur sida ke ngeduh nyak. Piak mega kebun bala anak mensia enda jauh gak ari kaki bukit nyak. Datai tikau kenok ko jerita. Nama deh… tak nyau besaut-saut meh kuruh sida 3 ngelabang munyi indu ngingit. Kira nyau ka dini ari, ari, tekura laban keregas gik aku dani ngerak planduk seduai nyumbuh. Maya nyak agi serepan malam ari. Enti baka diatu kira2 pukul 4 kitai nyak meh ia… planduk pan dani…. Tang meh tudah nyumbuh alu bedau kekebut ar… udah nyak dgerak pelanduk gak… nyak baru ia dani, nyau muka kuntau nyumbuh dani laban ke tekenyit ditendang pelanduk bak burit. Udah nyak sida tiga pan alu mupuk begadai nurun nuju kebuh pisang anak mensai di kaki bukit din. Datai din… tekura seduai pelanduk pan… aku numbak penumbak tambak pisang ke bisi bak kebun nyak. Ni macam tambak pisang meh ke ditumbak seduai. Peda enda lama udah nyak penuh gak selabit seduai laban tambak pisang. Tang meh enggik tudah nyumbuh aku bedau kekarik ar… numbak dua tiga pun tambak pisang ngetu gak udah nyak ngerujak ke buah pisang.
“apuu….nama gak pengawa dik baka nyak nyumbuh… tak alu bedau kekarik selabit dik nyak ke panuh…” ko pelanduk. Nyumbuh nadai memunyi… majak ia ngerujak ke buah pisang kedalam mulut ia, nyau engkuam nyawa ia laban buah pisang. Meda pengawa nyumbuh nyak baka nyak diak deh tekura seduai pelanduk pan aku nulung nyumbuh numbak tambak pisang. Enda lama udah nyak penuah meh selabit tudah nyumbuh laban buah pisang. Udah selabit enggik nyumbuh nyak penuh, sida tiga pan aku ngebu ke diri ngelawa endur sida ia tiga ngeduh malam tadi besagam betunjau ke terang bulan nyak meh sida tiga ngelawa endur nyak. Sida datai bak endur nyak, ari pan ngerebak tawas. Nyak meh munyi kukuk manuk nyau beterauh madah ke ari udah tawas. Peda tak rerembun asap api indu dara angkat berapi. “Akai…. Cukup nyamai buah pisang nyak tadi unggal… enda tau enda ditanam mayuh gik enggik aku ila…” piak ko nyumbuh. Laban ke enda kala makai buah pisang nyak meh tudah nyumbuh nyak tadi nyau ngerujak ngasak amat buah pisang. Nyadi tekura seduai pelanduk enda memunyi.

Enda lama endar gak sida tiga ke ngetu diak, udah nyak sida sebuat pan aku ngebu Kediri ninggal ke bukit sengkabang pulai nuju menua sida ia empu di kampung pulau buah. Tang sebedau sida tiga ke mupuk tadi, diak deh tekura aku nyampu ke sida tiga ngena pengaruh ia batu enda ikak enggau batu ribut. Bisa mat pengaruh tekura tu kenok ko jerita, enda lama bejalau peda datai gak bak kaki bukit sepiak, tambak pisang ke diema pan nadai asai tak asai ke ngema kapas. Singkang kaki ukai main pengelaju… enti disemak ke baka kemaya ari diatu… kereta formula 1 nyak alah meh pengelaju ia laban sida tiga tu… bak kenok ko jerita teresak kayu ke memesai betis abis patah rimbas sida tiga ke bejalai nyak. Kira sesumbak silau sida tiga pan datai nuntung bak kaki tangga, nyadi nyumbuh alu nyau… niki pun tapang. Datai dirumah ari pan malam.
Lengka ke kitai dulu jerita sida tiga tu…. Kitai ngenang jerita bala anak mensia ke dicuri sida tiga tambak pisang gak. Nama deh…. Tak mucau besai meh bala anak mensia ke dicuri sida tiga tambak pisang… “nama meh antu ke ngereja tu….? Tambak pisang abis ditumbak anang ke buah ia nyau abis lengis sigi nadai meh agi….” Piak ko sekeda meda utai ke balat ngeyadi nyak. Amat tak ringgat besai bala empi serumah dikereja ke sida tiga. Kenok ko jerita… umbang pisang ke dibuai nyumbuh nyak, enti digumpul nyau ka bulih empat guni arr…. Bagas mat gak perut buntas nyumbuh nyak makai pisang. Ka sida ia nyidi bekau nyak… takut gak bala nembiak empi serumah meda bekau ke balat nyak. Teresak engkabang ke memesai besti abis patah laban sida tiga. Tambah gik bekau nyak nyak enda entu nyengenda igak. Nyak meh ke ngasuh bala empi serumah takut ka nyidi bekau nyak.

Pulai baru gak kitai ngagai menua kampung pulau buah. Ari pan pagi, cukup manah ari sari nyak… nyau perencing matapanas. Diak deh sida tiga pan aku nurun ketanah nebas alu nebang endur sida ke ka bekebun pisang. Enggik tudah nyumbuh laban keamu mata ukai main pemesai ar… litan kebun ia… nyau apas mata meda pemesai kebun tudah nyumbuh. Tang enggik tekura seduai pelanduk enda enda gak entu mit igak kira2 umbas ia pemesai meh. Laban litan kebun ke enda besai nyadi bisi belaluh tambak pisang pelanduk seduai tekura tu tadi. Nyadi semua laluh tambak pisang nyak diberi seduai ia magang ke nyumbuh… gaga meh tudah nyumbuh tu tadi.
Ari beganti ari, minggu betukar minggu, bulan pan nyau gak beganti. Nyau semak 6 bulan bepandam udah sida tiga ke nanam pisang. Pisang sida tiga pan bebuah. Nyadi pemansut buah pisang sida tiga tu tadi enda sebaka, enggik tudah nyumbuh laban ke ka beburuk nguntu kebun nyau kusi penumbuh pisang ia. Bisi bebuah tang meh semina beberapa sikat jak ke bak setandan nyak. Tang meh… pisang enggik tudah tekura seduai pelanduk ukia main pengalak… pisang ke bebuah ukai main pengelebat. Buah pisang enggik tudah nyumbuh udah lama abis… dipakai ia… nyak meh tudah nyumbuh tu ke ngining buah pisang tekura seduai pelanduk. Nyadi ngemai piang tekura seduai pelanduk tu galak mat… laban ke dibaja seduai ia ngena tanah dapur.. nyak pisang seduai ia galak.
Taja piak… tekura seduai pelanduk tusah amat ati… laban ke enda nemu niki. Ka pan enda buah ke larah nyak meh diempa seduai…. Ukai nyak nyamai buah pisang ke larah nyak, bak buah pisang seduai ke sekeda abis dipakai burung. Nama deh… sebana meh tudah tekura enggau pelanduk tu tadi. Ngambi seduai ke enda nebang pisang nyak tadi laban dikumbai seduai ia bebuah baru pisang nyak ila, nyak meh seduai ia enda nebang pisang nyak. “Akai akan….. naka meh pengelebu tua nanam pisang nyak… ka makai pisang enda gak tua tu nemu niki, semina buah pisang ke larah nyak aja ke diempa tua…. Ukai nyak nyamai….” Piak ko pelanduk nganu tekura. …” bak ia sambi…. tusah amat ati aku tu meda pisang tua tu tak nyau abis larah….”Ko tekura nimbal pelanduk.
Laban kebun ke betimpai, ninga meh tudah nyumbuh tu tadi utai ke dikerandau ke seduai. Nama deh…. Laban ke enda tau ninga rangkang patah alu terejun nyumbuh ari pun kasai ke nyadi antara kebun ia enggau tekura, alu terengkah bak mua pelanduk seduai tekura ke benung sebana nyak tadi. Seraya ke datai diak, enda cecamang urang empu alu nyaut ar… jaku tudah pelanduk seduai tekura. “ndai…. Nama meh utai ke bangat dikemana keseduai unggal..?”
Ko nyumbuh. Tak tekenyit manah pelanduk seduai tekura ke ditegah perut buntas nyumbuh nyak. “ ndai ar… unggal mbuh… kami duai sambi tu ka makai pisang ke benung mansau nyin… tang enda gak nemu niki… peda d… pisang ia ke sekeda nyau abis larah… “ ko tekura nyaut nyumbuh. Nyumbuh alu nyaut ar… jaku tudah tekura“ ndai….. nadai nyak tak ngasuh ati seduai tak bangat tusah deh unggal… legi meh aku niki keseduai… “. Nyadi tudah pelanduk alu enda memunyi. “ bah tiki diak meh unggal…..” ko tekura ngasuh nyumbuh. Nama deh…. Naka meh pengaga ati nyumbuh laban ke diasuh niki pisang tekura seduai pelanduk nyak tadi. Laban sigi tak gagit setera bam, peda tak alu merejuk alu makap batang pisang urang empu…. Mula ia ke niki nyak setandan pisang keling dibuai ia ke pelanduk seduai tekura. Nama deh… gaga meh ati seduai dua nyak laban ke ulih makai pisang mansa..
Peda udah nyak nyau gak nyumbuh merejuk agi pisang sigi… anti muai enda gak muai keseduai buah pisang…. Nyak meh kenok ko jerita, nyau ngerujak pengerujak meh tudah nyumbuh bak atas pun pisang din. Peda umbang pisang gak terengkah dibaruh. “ apuu… unggal buai ke kami meh buah pisang nyak… anang diaja ke ngerujak ke ia bak atas diak….” Ko pelanduk.Tang meh tudah nyumbuh alu enda peduli kejaku pelanduk nyak… nyau ngasuh ia ngerujak pengerujak buah pisang. Nyau engkuam nyawa ia laban disegul ke ia buah pisang. Nyak meh nyau kejapik umbang pisang tekura nyak sebelah tanah dibuai nyumbuh. Peda udah nyak nyau gak ia ngelawa kebun pisang tudah pelanduk, baka nyak tadi gak ia ngagak dua iku nyak. Pengujung ia… abis meh pisang tekura seduai pelanduk nyak diempa nyumbuh. Tak naka meh pemedis-medis ati tekura seduai pelanduk ngagai nyumbuh. Nama deh…. Amat tak mucau besai seduai dua iku nyak laban nyumbuh. Nyumbuh udah kenyang, ia pan aku mulai Kediri ke pucuk tapang… “ sepi asai seduai dik…. Nyak meh kitai… enti enda nemu niki anang nanam buah ke enggai enda ditiki…..” piak ko nyumbuh ngelese ke tekura sedua pelanduk…. Nyumbuh pan alu nyau…. Tetanjun mulai Kediri ngagai pucuk tapang. “ buntas enggau perut dik nyak nyumbuh….” Ko pelanduk. Nama deh…. Semina mai pisang keling setandan nyak aja meh seduai ia pulai kerumah. Laban ke kelalu pedis amat ati ngagai nyumbuh, tekura pan mia pelanduk baum, ngigak akal dikena ngemedis ke nyumbuh nyak. Udah nyak seduai pan alu begigak ke wi enggau buluh semilu. Nyadi buluh semilu nyak diraut seduai tajam2 nyau baka mata pedang penajam ia.
Tetumu pagi dinga nyawa pelanduk seduai tekura nyau talu-talu belagu berayun bak batu kerangan bak semak penai sidak. Cukup manah munyi sera nyawa seduai kebelagu nya. “ apu unggal… peda dik apai enggau indai tau nyin nyau lindak2 ngena tangui benung ngetau…” kira piak meh lega jarak pelanduk seduai tekura. Mayau leka jarak seduai tang aku enda ingat… hehehhehe… Ninga meh tudah nyumbuh kebenung reranggak gali bak pucuk tapang din. Laban ke gagit mat ke deka betemu enggau apai seduai indai ia, tak alu nurun meh tudah nyumbuh tu td alu ngelawa tekura seduai pelanduk bak batu kerangan din. Nyadi kenok ko jerita, ngemai nyumbuh tu gagit amat ka betemu apai enggai indai ia laban apai enggau indai ia udah lama parai dibunuh bala anak mensia. Nyadi ia tu tadi diibun aki ia raja nyumbuh ari mit, sepengudah apai enggau indai ia parai. Piak meh ko jerita.
Datai bak endur pelanduk seduai tekura keberayun nyak tadi, diak deh nyumbuh alu nguji ka berayun laban ke ka meda apai enggau indai ia ko jaku. Majak meh tudah nyumbuh mujuk pelanduk seduai tekura ngambi ke nyali ia ayun nyak, tang meh pelanduk seduai tekura ngagak diri empu enggai. “uji aku berayun enda lama bah…” piak ko nyumbuh mujuk dua iku nya. “ enggai…………” ko saut dua iku nyak gak. Macam2 meh danji digaga nyumbuh keseduai ia tang meh seduai dua nyak tetap madah enggai. Nyau lama kelama sepengudah ke bepujuk-pujuk nyak.. diak deh tekura alu madah ka arr… “ auk meh unggal… tang meh ngena syarat, nyadi tubuh dik unggal nyumbuh kami duai tamcang ngena wi tu… lalu lubang tumbung dik kami acuk ngena buluh semilu tu, laban tubuh dik besai, enggai ke ayun kami duai tu runtuh ditepan dik dilegi… nyak kami ngaga dik baka nyak.. ka dik? Piak ko tekura.
Nama deh…. Laban ke ka agu-agu mimit serta gagit alu nyanggup ka meh tudah nyumbuh tu tadi. “auk meh…. Ni ko seduai diak meh… asal meh aku ulih betemu enggau apai seduai indai..” ko saut nyumbuh. Udah nyak alu ditangcang pelanduk seduai tekura meh tudah nyumbuh tu tadi ngena wi semut. Kaki, jari, rekung abis di tancang… nyak meh kenok ko jerita tak ditancang seduai ia naka pengerat-erat tudah nyumbuh tu tadi… udah tubuh nyumbuh nyak ditancang, nyumbuh nyak pan aku diasuh seduai betungging... udah nyak alu diacuk seduai ngena semilu lubang tumbung tudah nyumbuh nyak tadi… nyak meh kenok ko jerita amat tak rauh2 meh nyumbuh nyak tadi, ngetat ke pedis ia… “Tat ke tat….. nyin apai enggau indai dik udah nganti dik aba perau din….” Ko pelanduk. Ka nyumbuh ngelaban, ia udah nadai daya agi laban ke udah ditancang seduai nyak amat2. Kenok ko jerita, semilu ke diacuk dua iku nyak ari lubang tumbung nyumbuh nyak tak alu tembus agi punjung aji nyumbuh nyak arr… Dinga tak munyi resu nyawa nyumbuh nyak aja ke didinga.
Udah nyak… nyumbuh nyak pan alu diayun ke pelanduk ari atas batu keranggan, nyadi tekura diasuh pelanduk netak tali aku nyak. Nama deh…. Nyau tetalang meh tudah nyumbuh labuh kebaruh alu ninggang batu keranggan di baruh din. Peda tak abis tebelarak kerat isi nyumbuh sepengudah ia ke terengkah dibaruh din. Nyau enda bepadah ke nyawa meh tudah nyumbuh nyak tadi laban pelanduk seduai tekura. Nama deh… mati meh tudah anak nyumbuh nyak tadi. Udah nyak tekura seduai pelanduk pan alu nurun ngabas pemarai nyumbuh di baruh din. Peda tak semina tinggal rampang tudah nyumbuh nyak, nyadi kereban tubuh ke agi ulih guna semina tulang betis ia dua piak ke agi ngenda. Tang meh utai bukai udah ancuh magang… seduai pan alu ngambi tulang betis nyumbuh nyak, laban ke ka digaga ke sekuling (seruling). “sepi asai ia… udah ngemeli ke tau sari nyak…. Tu ungkup ia….” Ko planduk empiak ke nyumbuh. “manah mat tulang betis unggal nyumbuh tu enti dgaga ke sekuling unggal….” Ko tekura nyaut planduk.
Sepengelama seduai ke diak, seduai pan alu bepadah ke kerumah nuju rumah aki nyumbuh nyak madah ke pemarai nyumbuh bak batu keranggan din. Nama deh…. Laban nyak ucu ke pemadu di kesayau ia… tak nyabak meh aki nyumbuh nyak. Nyak meh kenok ko jerita tak naka pemesai nyawa ia meh ia ke nyabak nyak. Cukup pandai aki raja nyumbuh tu nyabak nyau munyi ke ditusun leka sabak ia. Sinu ati ningga. Nyadi kitai ngenang aki nyumbuh tu dulu… kenok ko jerita… aki nyumbuh dikumbai urang raja nyumbuh laban ia tu meh nyumbuh ke pemadu ia besai ke bisi nguan menua kampung pulau buah nyak. Tambah gik raja nyumbuh tu meh ke nyadi tuai bala jelu kebejelangkit. Taja piak ia enda serumah enggau sida tekura laban, raja nyumbuh tu ka jejai ait, nyak ia diasuh urang diau bak pucuk tapang Kediri din.
Ngulit meh semua bala jelu ke bisi bak kampung pulau buah nyak ke pemarai ucu raja nyumbuh. Semak dua minggu ulit nyumbuh nyak pan diketas. Sidak sekampung nyak pan idup baka biasa meh udah nyak. Sepengudah ulit nyumbuh nyak ke diketas, tekura seduai planduk pan ngejung rumah indu bubuk laban ke deka diasuh seduai ia nebuk lubang sekuling ke seduai ia. Bisi dua ari meh endur indu bubuk nyak nebuk ke seduai sekuling nyak. Tembu meh sekuling nyak udah nyak. Tak naka ia pemanah-manah sekuling ke digaga indu bubuk ke seduai ia… ukir nya becelikau sebelan bantang sekuling nyak, munyi ia ukai main penyarih cukup manah lebuh maya disepu. “ nama upah aku deh samba….” Piak ko indu bubuk nyanyak ke upah ia aba pelanduk. Pelanduk pan nyaut.. “ enti di bisi meda buah mansau larah, nyak tau dpakai d, nyadi nyak meh upah ia…. “ ko planduk. Laban ke enda beleman, Ka meh tudah indu bubuk tu tadi ke upah nyak.
Udah nyak seduai pan alu mulai Kediri. Nama deh…. Nyau talu2 meh munyi sekuling ke ditebah seduai nyak ningting pagi enggau lemai. Tekait mat ati raja nyumbuh bak pucuk tapang din ka ngempu sekuling seduai ia nyak. Pagi siti raja nyumbuh pan nurun ari pucuk tapang laban ke deka naban ke sekuling seduai nyak ke pucuk tapang kin. Maya nyak pelanduk seduai tekura benung nebah sekuling nyak bak ujung tanju ruai. Dtai diak deh raja nyumbuh aku ngumbuk seduai ngambi ke dua iku nyak nyali ia sekuling nyak. “uji aku nebah ia dulu ucu…?” ko raja nyumbuh madah ke planduk seduai tekura. Alu disuak ke tekura meh sekuling nyak ngagai raja nyumbuh. Gaga meh tudah raja nyumbuh tu tadi. “din aku nebah ia ucu… bak tanah din ngulih ke ribut…” piak ko raja nyumbuh nipu seduai ia. “auk meh aki…” ko tekura. Datai di tanah din… peda lama gik jauh gik gak raja nyumbuh nyak naban ke sekulling seduai ia. Ujung2 datai bak pun tapang endur ia diau ia ke nebah sekuling nyak.
Peda tak alu merujuk alu makap batang tapang nyak raja nyumbuh pan alu niki ke pucuk tapang kin naban ke sekuling seduai ia. kenok ko jerita tak naka meh pemedis ati tekura tu tadi laban ke ditaban ke raja nyumbuh nyak sekuling. Nyau nyabak tudah tekura meda sekuling ia ditaban ke raja nyumbuh. Nyau sesingggut meh tudah tekura tu nyabak dibaruh pun tapang nyak tadi. Tang mej raja nyumbuh tak alu enda peduli majak ia nebah sekuling dipucuk tapang din. Enda lama udah nyak mansa gerama… alu nanya tekura. “ndai…. Nama meh utai ke disabak ke nuan deh akan….?” Ko gerama nyak. Tekura pan alu nyaut enggau sesabak…” sekuling aku udah ditaban ke raja nyumbuh ke pucuk tapang kin…” ko madah ke gerama. Gerama pan alu enda ngenung enda lama. Meda tekura nyak nyau enggai bebadu ke nyabak gerama pan nyau kasih gak meda ia… “legi meh aku ngulih ke dik sekuling nyak ari raja nyumbuh…” ko gerema. Meda baka nyak tekura pan alu badu nyabak…
Kenok ko jerita… gerama kelia besai arr…. Nyau ka mesai capai enti ia kebesai… tambah megak landik meh gerama niki pun kayu. Tang meh laban keduah labuh ari pun tapang nyak gerama tu nyadi mit alu enda nemu niki pun kayu agi. Udah nyak…. Gerama pan alu niki pun tapang nyak ngelawa raja nyumbuh ke benung nebah sekuling dipucuk tapang din. Manah mat gak munyi leka sekuling ditebah raja nyumbuh. Laban ke sigi landik main utai bansa nyak enda ibuh disebut. Nyau talu2 munyi sekuling ke ditebah ia din. “tut, tut…. Teritut… meda puki indu dara tua nyau ngeredut…. “ piak ke ko munyi leka sekuling ditebah raja nyumbuh. Nyadi gerama pan aku begadai-gadai niki ke pucuk tapang ngelawa raja nyumbuh kebenung rindang nebah sekuling di pucuk tapang din. “kitik, kitik, kitik….” Ko munyi kaki gerama niki pun tapang….hehehe .
Udah nyak… gerema pan datai enda entu jauh ari raja nyumbuh ke nyandih. Peda gerama tak kayun-kayun telu pelir raja nyumbuh bak selepak dan tapang. “nyin ia….. legi sepi ia….” Ko gerama ar…. Tuyu gak gerama tu…. Lama gik semak gik gak gerama enggau telu pelir raja nyumbuh nyak… udah nyak… tak… dikepit ia telu pelir raja nyumbuh enggau sepit ia… nyepi telu pelir tak ngemedis-medis nyak…. Raja nyumbuh pan aku engkakai arr… “AKAI!!!!!.....” piak ko raja nyumbuh alu enggau panjung2… seraya udah nyak… sekuling tudah tekura pan alu tebelaka ari jari ia alu labuh kebaruh kin ngam2 bak mua tekura. Nyepi diri ngemedis-medis nyak dikepit gerema, raja nyumbuh pan alu numpu… gerama. Peda tak nyau tetalang gak tudah gerama labuh kebaruh alu ninggang batu keranggan… nyak meh kenok ko jerita, nyau simpak meh kerubung tudah gerama tu. Nyak meh ke ngujung ke gerama ke maya ari tu nyau mit2…
Nyadi tekura laban sigi nganti sekuling ia labuh alu pulai sepengudah ia ke bulih sekuling ia nyak tadi. Nama deh… kembai meh telu pelir raja nyumbuh nyak tadi sepengudah ke dikepit gerama. Nyau bebulan2 ia ngetat ke pemedis ia nyak alu enda gak telu pelir ia nyak surut, tang meh nyau majak besai sebesai arr…. Kenok ko jerita nyak ka mesai buah mawang telu pelir ia nyak. Ni manang ke bisi bak menua nyak, abis ditesau asuh belian ke pemedis ia nyak, nyak meh manang kenyalang, manang menaul, manang kesindap meh ke datai belian ke ia alu enda gak gerai… nyak meh ia bulan sigi peda besai gik gak telu pelir ia nyak. Nyak meh ia ngetat ke pemedis ia nyak nyau rauh2 malam enggau siang. Meda raja nyumbuh nyau ka parai gaya diak deh upuk seduai ucang alu madah ke raja nyumbuh manang pipit. Tak ketawa meh raja nyumbuh ningga seduai nyak nyebut manang pipit… “hahahahhahaha…. Nama meh utai ke ulih manang pipit nyak… tubuh jak k emit…. Skali aku negam enda mesa…” piak ko raja nyumbuh. Dua iku nyak alu enda memunyi.
Nyadi upuk seduai ucang tu… ucu ia gak… entunggal mbuh. Udah nyak… seduai nyak pan aku madah ke manang pipit asuh belian ke raja nyumbuh. Kira ka sesliau ari… manang pipit pan datai. Malam nyak… manang pipit pan alu belian…
“pit,pit… makin lama asuh ngerupit…
Pit,pit…makin lama asuh mit…. “ piak ko leka pelian manang pipit. Nyau pgelama-lama ke udah belian nyak… peda telu pelir raja nyumbuh pan aku surut ar…. Nyau baka biasa meh telu pelir raja nyumbuh nyak… bias endar gak manang pipit tu… Nama deh… gerai meh raja nyumbuh malam nyak. Pagi nyak… manang pipit pan alu nanya ke upau ia..” nama upah aku deh wai raja nyumbuh…. ?” piak ko manang pipit. “A…… enda ningga aku semak ke gik d bejaku…” ko raja nyumbuh, nyadi raja nyumbuh nyak ngaga diri enda ningga laban ia ka negam manang pipit nyak…. Kira ke ka diempa ia meh… lama gik semak gik gak manang pipit nyak bak mua raja nyumbuh. Udah nyak manang pipit pan semak mua raja nyumbuh.. udah nyak baru raja nyumbuh madah ke upah ia… “nyin… bisi d meda padi anak mensia ke benung mansau bak bukit sengkabang din… nyak meh upah d” ko raja nyumbuh… udah ke nyebut upah nyak, diak deh Raja nyumbuh pan alu meranggap ke nyawa ia… peda tak alu…. Negam manang pipit… nama deh…. Masuk ke dalam mulut ia kin meh manang pipit nyak. Ka pansut enggai gak nyadi… nasib gak maya nyak manang pipit bedau ditelan ia, semina dikulum ia aja. Manang pipit pan alu ngigak alak kena ngemansut ke diri empu ari nyawa raja nyumbuh nyak.

“apu…. Nyin aki enggau inik benung mantun….
Apu….peda dik…. aki enggau inik benung begantung kibung…
Apu... nyamai amat nyak arr…. Aki enggau inik benung bepanggung….
Tak benung bamput arr…. Aki enggau inik nyak dalam kibung…..” ko
manang pipit bejarak dalam mulut raja nyumbuh… dinga tak engkakah meh… raja nyumbuh ningga leka jara manang pipit nyak tadi… udah nyak… manang pipit pan alu mansut ke diri… nama deh…. Idup meh tudah manag pipit… sepengudah manang pipit ke pansut ari lubang nyawa raja nyumbuh nyak, diak deh… manang pipit pan alu nyumpauh raja nyumbuh…
“makin lama telu pelir dik raja nyumbuh makin besia… nyau mesai bangkat.,
Makin lama telu pelir dik raja nyumbuh makin besai… nyau mesai tibang…” piak ko manang pipit. Peda udah nyak telu pelir raja nyumbuh pan alu mansang besai arr…. Udah nyak manang pipit pan alu nerebai ke diri ngelawa menua bukit sengkabang. Nyadi maya nyak… benung mansau padi bala mensia dibukit sengkabang. Nyak meh… sampai ke sari tu pipit tu makai padi.
Laban ke udah diasuh raja nyumbuh.

Nama deh…. Kembai baru meh telu pelir raja nyumbuh nyak… nyau sakit baru ia laban nyak. Nyau bebulan-bulan ia ngetat ke pemedis ia nyak… dipelian ke ngena manang bukai enda gak gerai. Manang pipit diambi belian enggai gak laban ke udah ditelan ia, nyau jera deh tudah manang pipit belian ke raja nyumbuh. Nyau semak 2 taun meh raja nyumbuh tu ngetat ke pemedis ia, diak deh raja nyumbuh pan parai, laban pemedis ia nyak ke enda ulih diubat.
Ngitu pemarai ia meh bala sida tekura semenua. Sepengudah pemarai raja nyumbuh tu.. bala jelu ke nguan menua kampung pulau buah nyak pan alu nemu bekebun buah sepengudah ke diajar tekura seduai pelanduk. Berengkah ari sari nyak… sida semenua enda suntuk pemakai agi laban keudah bisi kebun buah Kediri empu…

Minta ampu ngagai semua bala pemacha… engka jalai jerita tu enda sebaka enggau jalai jerita ketemu kitak… laban kita pan nemu… bak siti2 menua lain gak jalai jerita tu ditusi…
Hehehehehe…..
The End..... (^_^)…
Hasil karya:
Boniface sili

No comments:

Post a Comment