EnsERa nEmbIaK: jerita apai sali nyual empikau

Ensera nembiak:
Jerita apai Sali nyaul empikau…

Maya nyak musim buah , bak batang gelung. Mayuh… buah sida apai Sali bebuah maya nyak, ia ke buah rian nyak… enda ibuh sebut… tak bekapal sebelah dapur. Sekali ngupak bisi ninggi diri umbang rian. Laban ensali ke rajin, amat tak tetiap pagi ia mulung buah rian bak kebun sida di sungai gelung. Nyadi kenok ko jerita menua sida apai Sali tu… ianyak batang gelung enda entu jauh ari menua sidak keling di panggau libau. Kira ke setengah ari meh bekayuh ari rumah sida apai Sali nuju rumah sida keling di panggau libau.
Apai Sali laban sigi ke ka amat makai buah rian, amat tak enyau cirit arr… nyak meh tai ia kenok ko jerita… amat tak nyau baka empikau buah rian nyak arr…. Hehehehehe. Meda buah rian nyak tak kelalu mayuh, indai Sali pan ngaga empikau rian, ngambi ke lama disimpan meh… kenok ko ia. Tambah megak apai Sali enggau anak ia ensali ka mat makai empikau. Nama deh… ia ensali mulung buah rian, digagak ke indai ia ke empikau gak buah rian kepulung ia nyak… kenok ko jerita, bisi nyak 10 benda empikau rian udah digaga indai Sali.
Meda empikau nyak ngemayuh nyak indai Sali pan ngasuh apai Sali nyaul empikau nyak bak pasar gelung. “ tambab…. Uji nuan pegila nyual empikau kitai nyak…. Diempa enda meh nyak alah… nyau sepuluh benda….” Ko indai Sali madah ke apai Sali ke benung reranggak gali nginsap daun apong bak mua pintu dapur sidak. Tambap ko indai Sali ngagau ke apai Sali tu ney…. Hahahahaha. “auk meh encelegit…. Bungkus dik diak meh empikau ke ka diungkup ke dijual aku pegila… “ ko apai Sali nimbal bini ia. Ney…. Encelegit nama indai Sali tu… digagak ke apai Sali… nyadi ensali enda memunyi… majak kusil-kusil ngupak buah rian ke indai ia ke ka digagak ke empikau.
Pagi siti… apai Sali pan nurun bejual empikau ke pasar gelung. Datai dipasar gelung apai Sali pan nyaul empikau ia… “empikau, empikau, empikau!!!..... sebungkus 5 sen…” ko ia… ngelaku ke empikau ia… nyadi ia ke nyebut 5 sen nyak tadi laban ke diasuh bini ia nyual nyak 5 sen sebungkus. Kenok ko jerita murah amat barang kelia…. Gula batu rega seringgit amat tak setin roti kitai kedia tu arr… . taja piak apai Sali ke bejual tu… tak enggai nerima duit arr…. Nyak gak penadak apai Sali… apai Sali ka sebungkus empikau ditukar ngena sigi buah runggan (buah betik). Nydi apai Sali tu ka ke buah runggan laban nyak aja ke bangsa buah ia nadai dikebun ia din, tambah mega apai Sali sigi ka amat makai buah runggan. Nyak meh kenok ko jerita amat tak dua lanji arr… buah runggan dibai apai Sali pulai.
Maya apai Sali ke bejual nyak… amat mayuh urang berebut ka meli empikau apai Sali. Angkat bisi siku raja gak maya nyak ke benung ngeraun pasar nyak ngigak urang ke bisi bejual empikau rian. Nama deh…. Ningga rita apai Sali ke bisi nyual empikau rian, alu kiak ia ngelawa apai Sali ke bejual empikau. “berapa sebungkus empikau rian dik tu apai Sali….?” Ko raja merum nanya apai Sali. Nyadi nama raja ke ko aku nyak tadi raja merum ko urang menua diak ngagau ke ia. “sebungkus 5 sen…. Ko indai Sali madah… nyadi kenok ko aku sebungkus sigi buah runggan…” ko apai Sali… ninga rega nyak baka nyak… ka meh tudah raja merum tu tadi meli empikau rian apai Sali nyak… laban sigi tak mayuh kebun buah runggan diak deh raja merum tak aku meli semua empikau rian apai Sali ke agi bedau nyak… bisi nyak ngelima puluh bungkus ke agi bedau. Nama deh… amat tak nyau dua lanji meh buah runggan apai Sali. Laban raja merum tu ke ka bam2 igak… alu diempa ia diak meh empikau rian apai Sali nyak. Sepi tak nyamai amat... enda kala ia makai empikau rian tak bangat ngeyamai nyak. Ia pan alu mekat bak apai Sali… ngasuh apai Sali nganjung ke ia empikau rian ke istana ia pegila.
“apuu… nyamai amat empikau rian dik tu apai Sali….. pegila bejual ke istana aku dik… pegila meh aku meli empikau di abis.. tang meh enti dik enda datai pegila dik aku ukum bunuh…” ko raja merum . Jai gak raja merum tu… apai Sali semina ngangguk ke pala. Setuju meh apai Sali ke aum nyak. Udah nyak laban empikau rian ia ke udah abis dibeli raja merum, ia pan pulai ngemai dua lanji buah runggan. Datai dirumah, gaga meh indai Sali tu tadi meda empikau abis dijual apai Sali. Apai Sali pan alu ngekah ke lanji ke diema ia nyaj tadi bak teluk dapur. “tambab… abis empikau rian ke dijual d tadi…? Ko indai Sali nanya apai Sali. “ abis arr…. “ ko apai Sali.
“berapa semua rega ia deh…? Ko indai Sali gak nanya apai Sali baru… lama tudah apai Sali enda nyaut Tanya indai Sali nyak. “er…… nyin meh semua rega ia, buah runggan ke dua lanji nyak…” ko apai Sali. Nyak meh indai Sali…. Nyau baka ke diunsut cabi mua indai Sali merening apai Sali. Tak naka meh pemedis-medis ati indai Sali meda apai Sali…
“apu….. merinsa meh dik tu tambab,tambab…… kitai ukai ka ngigak buah runggan… duit kedigigak kitai…. Sut2!!!....” ko indai Sali sambil mulas ke pending apai Sali. Apai Sali semina ngetat aja. Ensali semina rising-rising meda ulah apai enggau indai ia, maya nyak ensali benung ngupak buah runggan ke dibai apai ia nyak di tanju dapur din. “empa dik abis buah runggan nyak…. Enda alah empa segul ke lubang tumbung dik… “ ko indai Sali ngelanjur ke apai Sali.
“aku meh… sulu… ku encelegit ….” Ko apai Sali ngelese ke indai Sali. Nyak meh indai Sali kenok ko jerita… nyau ngasuh ia panas gik ati meda apai Sali. Tak semetuk kening apai Sali ditengkuk indai Sali. Amat tak begaru pala apai Sali ngetet kea bi tengkuk bini ia nyak. “ mangah….” Ko apai Sali bejaku belalai. Enda besai nyawa ia ke nyebut nyak, enggai ke ditingko urang baru legi.
Udah seduai indai Sali ke bebelaya cit nyak, apai Sali alu mansang ke dapur. Datai didapur ia pan alu ngupak buah runggan. Indai Sali pan baka nyak gak, sebela ngupak sigi siku sidak tiga menyanak. Nyak meh, laban ke agi pedis ati, melintu mata indai Sali merening apai Sali ke benun singam-singam mangkil buah runggan nyak. “enti dik ukai mensia… udah aku tukup pala dik nyak…. Meda untak dik kedadak nyak….” Ko indai Sali mucau dalam ati meda apai Sali. Sepengelama sida tiga kebetunggak makai buah runggan nyak. Diak deh apai Sali pan alu nanya indai Sali. “encelegit…. Agi bisi empikau kitai…? Ko apai Sali. “agi arr… bisi nya setengah benda dak agi… nama deh ? ko indai Sali. Manah gak munyi saut indai Sali. Ningga saut bini ia munyi nyak, apai Sali pan aku niau ke diri. Tanya ia gak anak ia ensali. “dom…. Agi bisi buah rian kitai di ulu din? Ko apai Sali. “udah abis apai…. Nyau udah abis pulung aku ari nyak, maya seduai indai ke deka bejual empikau…” ko ensali nyaut apai ia. Enda memunyi apai Sali udah nyak. Pgelama sida tiga ke makai buah runggan nyak, peda tak abis selanji buah runggan diempa sida tiga.
Udah nyak apai Sali, ngulung insap ia. “bakani meh… aku tu ka nyual empikau ke raja merum pegila…?” ko runding apai Sali. Laban ke kelalu bendar makai buah runggan sari nyak tadi, pedis perut meh sida sebilik. Diak deh apai Sali alu teulih ke akal, maya ia ke benung birak bak agu. Pansut ia ari agu nyak, apai Sali pan alu nanggung benda ke agi bisi empikau rian nyak ia, alu diengkah ia aba baruh agu din. Nyadi benda nyak, kira ati ia din ka dikena ia nambun tai. Enda nemu indai Sali tadi ia ke engkah benda nyak aba baruh agu. Nama deh… asal birak labuh ke benda nyak meh tai sida sebilik tadi. Laban ke udah bendar makai buah runggan, lemai nyak amat tak pansut, tamak sida sebilik ari aku nyak. Udah apai Sali, indai Sali, gak tamak agu udah nyak ensali gak. Amat tak buah runggan tuci ke dikemirak ke sida sebilik. Tai bau buah rungga. Ia ke apai Sali amat tak bepuluh kali ia tamak agu dalam semalam nyak.
Pagi nyak, tumu apai Sali nurun ke tanah ngambi benda empikau ke diengkah ia bak baruh agu kemari. Peda, amat tak nyau penuh benda nyak laban tai sida sebilik semalam-malam nyak. Benda nyak pan alu ditaban ke ia ngaga libun padi sida diujung bilik. Datai din apai Sali pan ngirau tai dalam benda nyak ngena sengayuh ngambi ke tai nyak becampur enggau empikau ke agi bedau dalam benda nyak meh kira ia. Udah nyak becampur meh tai enggau empikau, nyau nadai temu bagi tai agi nyak laban keudah becampur enggau empikau. Semina bau ia aga ke lain. Udah nyak benda nyak pan dibalut apai Sali manah-manah ngena kain mirah, laban alu ka dibai ia enggau benda2 nyakgik isatana raja merum. Udah makai pagi, apai Sali pan alu nyau bekayuh nuju istana raja merum diulu sungai gelung.
Nyadi ia ke ngereja pengawa nyak nadai madah ke bini ia, ia. Datai diistana raja merum ia pan nyual empikau nyak agi raja merum. Laban ke udah bendar dianu bini ia lemai kemari, enggai ia dibeli raja merum ngena buah runggan. Nyau ngena duit mah raja merum meli buah runggan ia sari nyak. Laban empikau nyak ke dijual alu enggau benda2 mal gik rega ia. Lebuh maya apai Sali ke bejual empikau nyak, diak deh apai Sali enda ngasuh raja merum muka tudung benda nyak . “ulih aku meda empikau nyak deh apai Sali” ko raja merum. “ endah ulih ar… laban enti dik muka ia maya tu… diak deh penyamai empikau nyak lenyau legi…legi meh dik muka ia udah aku enda dipeda dik belakang legi….” Ko apai Sali nyaut raja merum. Raja merum pan alu meri apai Sali sepeti duit. Laban ko aum seduai ia mula tadi, sebenda empikau, sepeti duit. Udah nerima duit nyak, apai Sali pan alu ngebu Kediri berumban-rumban nuju perau ia. Tak penegar tulang ia meh ia ngayuh ke perau ia nyak tadi pulai ke rumah ia.
Datai dirumah, amat tak reriggang urang empu ia ngesan peti duit ke diberi raja merum nyak tadi niki kerumah. Datai dirumah, apai Sali pan alu ngagau ke indai Sali kebenung nusuk tangi bak bilik dapur. “encelegit….. peda dik deh utai ke dibai aku…” ko apai Sali. Datai diak, indai Sali pan alu muka peti ke disan apai Sali nyak. “ apuu….. dini dik bulih duti sepeti tu tambab….” Ko indai Sali ngapu meda duit bangat tak ngemayuh-mayuh nyak. “ney….. kumbai dik tambab aku ngelama tu… kemari aku bulih buah runggan bejual, saritu aku bulih duit sepeti, pegila nama enda utai ke diulih aku kini…. Kada enda indai Sali numul 2 kini…. Hahahahahahaha….” Ko apai Sali ngelese kebini ia. “ gamal dik……” ko bini ia gak enggai alah. Ningga apai seduai indai ke capuh bak bilik besai ensali pan kia meda utai ke dikemegau ke apai seduai indai ia.
Lengka ke nangka tu dulu jerita sida apai Sali ke benung gaga nerima duit sepeti nyak. Nyadi kitai ngenang raja merum gak. Laban ke nitih ke ajar apai Sali tadi, sepengudah apai Sali nadai dipeda raja merum pan alu ngasuh ulun ia muka engkabung benda empikau nyak tadi. Amat tak nyau meali-ali bau empikau ke pansut ari benda nyak. Nyium bau empikau nyak manah gik ari bau empikau kekemari, raja merum pan alu ngasuh ulun ia ngenah ke ia makai.” Amat ko jaku apai Sali tu…. Nasib aku enda muka empikau tu bak mua ia tadi…. Nyau neritik asai liur nyium bau empikau tu… “ ko raja merum ingat ke ajar apai Sali tadi. Diculik ia mimit, sepi tak lain asai, empai nyentuk endar gak asai empikau nyak. Udah nyak minta senduk ia. Peda amat tak nyau sesenduk nyak empikau nyak ke dikauk ke ia, alu ditegam ia. Bedau gak…. Ngentuk endar asai empikau nyak… “nama tak lain asai empikau apai Sali tu… tak ka pepait…” ko dalam ati ia din. Kauk ke ia baru gak empikau nyak, sesenduk alu ditegam ia… nyepi ka lelain asai.. luak ke ia aba pinggai… peda bisi kerat runggan arr… “patut empikau tu lain asai… bisi dicampur apai Sali buah runggan…” ko raja merum. Nama deh… laban ke sigi ka makai empikau empa ia aja meh empikau nyak, abis asi nyingkau baru gak ia, dunjung empikau sebelah pinggai ia lembau dik ngebut, amat tak nyau bedunjug arr…
Kepenudi ia, peda bisi daun ubi gak aba empikau nyak… “ aik…. Nama empikau tu bisi daun ubi…? “ ko raja merum nanya bini ia. laban lemai sida apai Sali ke makai buah runggan nyak belauk daun ubi sida sebilik. “enda nemu ar…. “Ko bini ia nyaut raja merum. Ngetu raja merum makai. “kada enda…………….. tai apai Sali kini tok…..?”ko raja merum. Udah ia ke nyebut nyak raja merum pan alu mutah arr…. Nyak meh kenok ko jerita… amat tak nyau kuak2 ia mutah. Udah ia kemutah nyak, diak deh ia alu ngasuh ulun ia meresa empikau kedalam benda nyak. Peda amat tak tai apai Sali ke dicampur empikau nyak, raja merum pan alu mutah baru. Udah nyak peda amat tak nyau tetalang benda empikau nyak diayun ke raja merum ke ai gelung.
“bancat…. Perut buntas apai Sali tu…. Nyau tai ia ke dijual ia… nadai guna idup mensia tu…” ko raja merum mucau. Amat tak naka meh pemedis-medis ati ia meda apai Sali. Udah nyak ia pan alu ngerah bala ulun ia diasuh ia nangkap apai Sali. Ulun ia pan alu nurun ngigak apai Sali.


Seari-ari nyak ke begigak ke apai Sali enda gak ditemu sida. Ari siti baru sida tetangkap ke apai Sali ke benung mutung getah di kebun ia. Apai Sali pan alu dibai ke istana raja merum. Maya ia keditangkap raja merum nyak bini ia enda nemu. Datai bak istana raja merum, raja merum pan alu ngasuh bala ulun ia ngurung apai Sali bak sangkar besi. Kebuah piak, laban raja merum ka munuh apai Sali enggau cara ngerendam apai Sali bak ia sungai gelung. Nama deh, tusah meh ati apai Sali ngenang nasib diri ke deka dibuai urang ke dalam sungai pagi pegila. Sebedau ia ke dibunuh pegila, diak deh apai Sali bisi siti peminta aba raja merum. Ia ngasuh raja merum mungkul sangkar besi nyak ngena kain celum pegila sebedau ia dibuai ke dalam sungai.”raja merum…. Sebedau dik muai aku ke dalam sungai pagila, aku ngasuh dik mungkul sangkar besi tu ngena kain celum… lak ke aku enda ulih ngelepas ke diri..” ko apai Sali madah ke raja merum. Laban ke deka dibunuh pagila, diak deh sangkar besi endur apai Sali nyak diengkah urang aba tebing sungai. Nama deh… duduk meh apai Sali nyerungkung dalam sangkar nyak.
Udah nyak, mansa raja sebungkuk, meda apai Sali bak sangkar besi nyak… ia pan alu ngelawa apai Sali.”ndai….. nama gak dik dalam sangkar besi nyak apai Sali…?” ko raja sebungkuk nanya apai Sali. Kenok ko jerita, raja sebungkuk tu meh urang paling kaya bak menua nyak… semua utai ke dikena ia, digaga ari emas magang. Baju mas, perau mas, sengayuh mas,… bak ia emas magang dikena ia. “nadai….. ke ngedal kebelakang bungkuk, ngambi ke badu bungkuk…”ko apai Sali. Nama deh… laban sigi ke ka ngasuh belakang badu bungkuk, diak deh raja sebungkuk alu mai apai Sali besilih. “ uju aku gak dalam nyak…. Ka ngasuh belakang aku tu badu bungkuk…” ko raja sebungkuk. “ auk meh…. Tang meh ngena syarat… nyadi pakaian dik di kena aku, pakain aku dikena d.... jampat dik badu bungkuk legi…” ko apai Sali ngakal raja sebungkuk. Nama deh… ka meh raja sebungkuk nyak tadi dibai apai Sali betukar.
Udah nyak… raja sebungkuk pan alu muka sangkar besi nyak, apai Sali keluar, raja sebungkuk masuk. Besilih baju meh seduai ia. Nyadi apai Sali kedalam sangkar besi nyak tadi ndang sigi enda dijaga bala uluh raja merum. Laban urang maya nyak ke mayuh pengawa nyak sida enda nyaga sangkar besi nyak. Udah nyak apai Sali pan alu nepan perau raja sebungkuk. Alu nyau meh apai Sali ngelari ke diri pulai ngagai rumah ia. Maya nyak laban raja sebungkuk ke baru pulai nyual buah engkabang, mayuh mat duit emas bak peti duit raja sebungkuk. Nama deh… gaga meh tudah apai Sali ngempu duit nyak. Datai bak penyangkai sida, apai Sali pan nurun. Nyak meh indai Sali maya nyak laban ke benung nurun nyauk gaga mat ia meda laki ia pulai tak mai perau emas enggau duit emas sepeti. “kaya meh kitai tu tambab laban d…..” ko indai Sali.
Kitai pulai baru ngenang raja sebungkuk ke dalam sangkar besi bak rumah raja merum. Pagi nyak, kira2 dini ari meh ari maya nyak, agi serepan tawas. Raja merum pan alu ngasuh bala ulun ia ngambi kain celum, dikena mungkul sangkar besi nyak, nitih ke ajar apai Sali lemai kemari. Udah sida mungkul sangkar besi nyak ngena kain celum, sida pan alu muai sangkar besi nyak ke benung sungai. Dalam amat sungai gelung nyak ko jerita. Nama deh… berebuk meh lubang idung raja sebungkuk dalam sangkar besi din. Udah nyak raja sebungkuk pan parai. Nama deh… parai meh apai Sali ko raja merum. Nyadi apai Sali ke dimenua ia din nyau nyadi kaya arr… laban duit ke diulih ia nyak. Cukup senang meh pengidup sida apai Sali sebilik udah nyak, nadai utai ke nadai didalam bilik sida...
The end!!!..... (>_<)…

Hasil Karya: Boniface sili