Friday, August 3, 2012

Anak Nyemetak / Lemetek

Anak Nyemetak / Lemetak


Di kampung jerung, nadai di dingga kensung numbuh bujang, diak deh bisi dua iku melaki bini ke nguan menua nyak. Nyadi nama menua nyak diberi nama pulau sengkabang, laban mayuh mai pun engkabang aba menua nyak, nyak meh kebuah nama menua nyak digagak pulau sengkabang. Kenok ke jerita, seduai melaki bini tok tau mindah ngagai pulau sengkabang laban sepengudah laki ia, ianyak Punai ke deka dibunuh entua ia laban ke dikumbai entua indu ia ianyak (Rabai ) punas. Nyadi bini punai tok benama santa lalu apai Santa tok benama Luggup.

Lebih ka 20 tahun Punai enggau Santa udah jadi, tang meh lalu nadai gak anak. Diasuh entua ia rabai sarak, tang meh punai enggau santa enggai sarak. Laban kelalu sayau ke pangan diri meh nyak kini. Mayuh macam udah penemu dikena entua ia ngagak punai ngambi ninggal ke santa, tang meh siti pan nadai meh nyadi. Ngambi indai santa nyak bekeras mai deka nyarak ke punai seduai santa laban, ia deka ngasuh santa nyak jadi enggau entunggal ia empu ianyak cabuk. Cabuk tok udah sarak enggau bini ia, lalu bisi anak siku. Diak deh ribai lalu berunding deka munuh punai. Nyamai agi ia mati, piak ko runding ribai.

“apai endu, kati baka runding nuan... setuju tau ke enda enti tua munuh punai nyak, piak enda meh ia tau ngasuh endu santa nyak beranak.” Piak ko ribai madah ke laki ia.

“ni ko nuan meh indai endu... tang baka ni cara ia deh?”... ko Tanya luggup gak gik bini ia.

“enti nuan bisi bejalai ngasu pegila lusa, enti bisi tetemu ke ular bisa, baka ular tedung, ular belalang bai nuan ulih ke nuan bisa ular nyak... bisa nyak dikena tua ngeracun punai...” ko ribai nyaut laki ia...

“aok meh indai endu... pegila aku mai igat cabuk nagasu ke ulu gerung... din mayuh ular ke bisa-bisa”... ko luggup.



Nadai nemu diri meh tudah punai tok tadi ke deka dibunuh entua ia. Santa pan baka nyak mega. Begulai meh seduai baka selama, enti ketanah sama ketanah, enti nurun kumai sama kumai. Entua indu ia pan nadai meh mayuh jaku agi, laban ia sigi nemu punai nyak sigi mati enti diracun ia enggau bisa ular.

Pagi siti luggup pan lalu nyedia ke perengka dikena ia ngasu. Ni baka sangkuh, sumpit, lajak, duku meh nyak diak. Nyadi punai semina ngemata ke entua ia nyak.

“kini nuan ngasu apai?.... ko punai nanya entua ia..

“eh... ke ulu gerung ... ka mai igat cabuk aku legi... dik nibuh enggau, nadai ngemata ke utai dirumah ditu,... babi ke ngandung ari nyak nyau ka beranak dak arr...” ko luggup nyaut menantu ia punai. Punai pan nadai memunyi agi. Udah nyak, semua perengka ke deka dibai ia pan udah cukup magang. Luggup pan lalu ngelawak bilik sida cabuk.

“nyadi nuan igat cabuk.... enggau aku ngasu lemai legi...?”... ko luggup nanya cabuk ke benung kiruk-kiruk ngasah duku aba ujung tanju sida ia di ujung bilik din.

“nyadi ayak.... peda dik udah sedia magang perengka aku ditu... “... ko saut cabuk gak.

“udah makai tengah ari lgi mupuk tua... ukai nyak semak-semak ke ulu gerung kin... “ ko luggup nyaut cabuk.

“aok meh ayak.... indai benung manduk lauk diak”... ko cabuk.

Udah nyak luggup pan lalu mulai ke diri ke bilik ia empu, nganti bini ia ke berenah makai. Luggup pan lalu ngulung insap daun rukuk. Amat tak beluit kaki urang empu ngetat ke penyamai isap daun rukuk nyak. Asap ke pansut ari nyawa nyau baka asap kapal. Nyadi santa enggau punai udah nurun kumai maya nyak laban ke benung betambak maya nyak. Udah makai pagi tadi alu nurun seduai melaki bini nyak. Ribai pan lalu ngenah ke laki ia makai. Daun ubi campur manuk lauk seduai ia tengah ari nyak.

Udah badu makai, luggup pan lalu ngadu ke diri. Udah nyak ia enggau cabuk pan lalu mupuk ngelawak menua ke dikumbai ulu gerung. Kenok ko jerita, amat mayuh jelu aba menua nyak. Engka menua nyak sigi tak endur bala jelu diau kini. Urang bukai ke semak menua nyak sigi enda punkang kasam babi, salai babi laban enti nyau ka abis nurun ngasu gak sida ia. Jauh diri gak menua nyak ari menua sida luggup. Enti mupuk tengah ari ari rumah sida di rantau arau, datai enda pan nyau ka padam mata panas meh aba menua ulu gerung nyak. Laban urang kelia ke tegal , jauh ni nadai meh asai sida. Enti baka diatu, ka ia semak ni ngena kerita meh bejalai. Pengelama seduai ke bejalai ngulu ai sungai arau, seduai pan datai aba menua ulu gerung. Laban ari ke nyau udah serepan seduai pan ngagak langkau arau aba kaki bukit tepus. Pama meh bisi endur seduai ngenduh ngetu belelak. Siang pan nyau betukar malam, cabuk pan lalu ngidup ke api dikena seduai berapi lalu ngagat ke isi. Sepengudah seduai ke makai malam, seduai pan gali enda lama ngetat Kediri.

“igat cabuk... enti nuan bisi meda ular ke bisa... madah ke aku nuan... laban aku ka beguna ke bisa ia kena ngagak ipuh sumpit..” ko luggup madah ke cabuk.

“aok meh ayak...” ko saut cabuk...

Cabuk pan lalu pansut keluar laban ke ngisap. Sepengelama seduai ke udah belelak nyak tadi, diak deh cabuk bisi ningga munyi kerus utai enda entu jauh ari langkau seduai ia nyak. Luggup pan bisi meh ninga. Sebela pansut seduai mending utai ke memunyi nyak tdi. Lama gik semak gik gak munyi kerus utai nyak tadi. Peda seduai ia tak babi bindu benung ngerit upa aping ke enda entu jauh ari seduai ke ngagak langkau. Enda cecamang, diak deh tudah cabuk pan lalu enkecit, lalu nikau ke sangkuh gik babi nyak tadi, tang meh enda kena, semina ngerimbas kaki babi nyak ajak. Nama agi... babi nyak pan lalu belari nuju ke ai kerapa ke dibaruh bukit din. Pemesai babi nyak bisi mesai tong gas kitai ke diatu. Luggup semina merati ke ulah cabuk. Udah nyak seduai pan ninduk ke diri. Pagi siti seduai pan lalu bejalai sebelah kampung nyak, jelu ke mimit abis dibai bai seduai laban ke deka dikelauk seduai ia makai. Baka sida tupai, sida burung ruai. Malam siti seduai pan ngagak alai endur nginau babi aba pun kara. Maya nyak benung labuh buah engkabang, nyak ke ditutu babi. Malam tok malam kedua sedua diau ditanah. Tang meh nadai bulih babi.

Sida ribai ke dimenua rantau arau din pan nganti penatai laki ia. Baka Selama megak punai seduai santa pan bejalai ke pengawa ke selalu dikereja seduai. Malam nyak diak deh punai bisi mimpi, dalam mimpi nyak ia betemu enggau indai tuai siku ke madah nama diri ia indai abang.

“kasih meh tudah nuan punai... lalu enda nemu diri ke deka dibunuh entua nuan ribai... pegila entua nuan ke lelaki datai ari ulu gerung, ia bisi mai bisa ular belalang, nyadi racun ular nyak ke deka dikena entua nuan munuh nuan... nuan anang enda lari ari rumah tok, enggai ke nuan lesi bebadi laban entua nuan... enti nuan amai sayau ke endu santa, ia pan tau ditaban ke di lari ngagai pulau sengkabang... menua nyak aba ujung menua rantau arau...” piak ko indai tuai nyak madah ke punai dalam mimpi...

Baru ka bejaku tudah punai diak deh bini ia santa lalu ngerak ia dani, laban ari nyau udah pagi. Lama tudah punai duduk tegenung ngenang mimpi ia nyak tadi.

“nama meh empa mimpi aku nyak tadi ney...” piak peragam ati punai.

Punai enda nusi ke bini ia mimpi nyak tadi. Baka selama megak, udah makai pagi seduai bini pan lalu nurun kumai nambak umai seduai. Tinggal seduai ke betambak tadi. Luggup seduai cabuk pan datai gak dirumah. Nyak ka ngalih ari meh seduai ia ke datai nyak tadi. Amat besai babi ke ulih seduai ia nyak bisi nyau ka mesai tong dram. Gaga meh ribai meda utai ulih laki ia nyak tadi. Riban pan lalu nanya laki ia.

“apai endu... bisi nuan bulih utai ke diasuh aku gigak nuan ari nyak...? ko ribai nanya laki ia.

“bisi arr... “ ko saut luggup.

Luggup pan lalu mantai ke pucung siti ke bini ia. Dalam pucung nyak bisi bisa ular belalang ke baru udah diulih seduai ia cabuk maya seduai ia ke mangsang ka mulai ke diri kerumah. Alu senyum urang empu ia meda pucung ke dibantai ke laki ia nyak.

“parai meh nuan malam tok punai-punai...” ko ati ia din.

Di kebun din punai seduai santa baka ken emu gak lemai nyak, diak deh punai nunu buah ubi ke semak langkau umai seduai. Laun mimit seduai pulai sari nyak laban ke rindang nunu buah ubi di umai din. Udah buah ubi tunu nyak mansau seduai pan lalu makai. Udah nyak seduai pan lalu mulai Kediri. Datai dirumah peda utai udah sedia magang laban entua ia ribai. Datai seduai dirumah seduai pan nurun ke ai lalu mandi. Ribai pan lalu berenah makai sepengudah seduai ke nurun tadi. Udah seduai tembu mandi seduai pan pulai, datai dirumah peda pemakai udah sedia, nganti ke makai dak.

“makai wat... “ ko entua ia madah ke punai.

Punai enda memunyi laban meda utai tak lain amat, enda baka selama. Mangkuk lauk ia ditikas entua ia Kediri. Diak deh enda nyamai asai tudah punai tok tadi meda utai baka nyak.

“ enda aku indai.... agi kenyang aku makai buah ubi tunu di umai tadi...” ko saut punai

Meda ia enda makai bini ia pan madah enda gak... entua ia nyak tadi enda memunyi. Masam mua urang empu, merening punai. Dalam mangkuk lauk punai nyak tadi bisi racun ular belalang ke di engkah entua ia tinggal seduai bini mandi ke ai tadi.

“malam tok nuan enda ulih aku... bisi gik ari bukai... baka ke nemu mati salai punai nyak...” ko ribai bejaku Kediri. Lauk malam nyak manah endar, babi kampung gulai buah terung. Punai seduai bini pan lalu beratur tinduk. Lebuh ke gali nyak tadi, punai pan madah ke bini ia, mimpi ia demalam. Enda memunyi santa ninga mimpi laki ia nyak tadi. Punai pan lalu madah ke bini ia.

“santa... enti nuan amai sayau ke aku sanggup ke enda nuan nitih ke aku lari ngagau menua pulau sengkabang pagi pegila...” ko punai madah ke bini ia.

“ni ko nuan meh punai... aku tetap nitih kini ke dibai nuan, asal meh tua begulai... “ ko saut santa.

Ningga saut bini ia munyi nyak senang meh ati punai. Ia pan lalu ngasuh bini ia nyimpan perengka ke deka dibai seduai lari pagi pegila ke dalam lanji. Santa pan lalu ngigak utai ke dibai.

Pagi siti, ketebak tawas punai seduai bini ia santa pan madah ke diri deka nurun kumai. Jalai seduai sigi nuju jalai kumai, tang meh datai di umai din seduai pan lalu limpang ke bukai ngigak jalai nuju ke menua pulau sengkabang. Jauh amai menua pulau sengkabang nyak ari menua sida di rantau arau. Bulih dua ari tiga malam meh seduai ke udah bejalai nenggah kampung puang nyak, seduai pan datai gak aba menua pulau sengkabang nyak aba ari ke ketiga. Menua nyak ending sigi nadai endur mesia diau, utai ke nguan menua nyak semina bangsa jelu ajak. Sepemanjai seduai ke bejalai nuju menua pulau sengkabang nyak, seduai bisi tanda, bisi utai dititih ke seduai, nunjuk ke seduai jalai. Laban sebedau punai enggau santa ke nurun pagi nyak, diak deh punai bisi kenyap. Dalam mimpi ia nyak, punai betemu enggau indai tuai ke madah ke menua pulau sengkabang nyak suba. Indai tua nyak madah ke ia...

“wat punai.... seduai melaki bini anang irau ke tesat maya bejalai nuju ke menua pulau sengkabang nyak, laban sigi bisi utai deka ngiring seduai... enti maya siang ari diak deh dik bisi meda kijang putih, betanduk emas dulu ari seduai, nyadi kijang nyak deka ngiring seduai maya ari siang, ti nyema seduai bejalai malam, diak deh dik bisi meda bintang buyu, bintang nyak meh kedeka madah ke seduai bejalai maya malam ari. Taja piak... enti nyema seduai udah datai di menua pulau sengkabang ila... enti nyema bini nuan datai indu, anang ngasuh ia nyembui sirat ke dikena ia aba ujung tanju maya lemai ari... laban enggai ke di kacau utai ke jai....” piak ko jaku indai tua nyak dalam mimpi punai malam nyak...

Maya seduai ke bejalai nuju menua pulau sengkabang nyak, ending sigi bisi amai utai ke dipadah indai tuai dalam mimpi punai nyak. Lebuh maya seduai ke udah datai di pulau sengkabang nyak, punai pan nusi mimpi ia nyak ke bini ia. Sepengudah seduai ke datai di menua nyak, punai enggau bini ia pan ngigak alai ke manah endur ngagak langkau. Seduai pan lalu ngagak langkau arau dulu, edur seduai ngenduh malam nyak. Enda belemai seduai melaki bini malam nyak, udah makai, seduai pan lalu ninduk Kediri laban ke kelalu lelak udah bejalai ngeredak kampung puang beberapa ari ke udah. Malam nyak, diak deh punai pan bisi kenyap baru gak, mimpi betemu enggau indai tuai nyak baru. Dalam mimpi ia nyak, ia bisi meda bala urang ke benung beramu, urang bumai meh di peda ia....

“wat punai.... datai gak seduai melaki bini di menua pulau sengkabang tok.... peda d urang ke benung beramu nyin... ramu rumah seduai dik ke di gagak urang nyak, peda dik sida ke benung betambak nyin... umai seduai dik ke ditambak sida ia.... anang irau nuan punai, kami dimenua tok sigi datai nulung mantu seduai melaki bini enti maya seduai bisi beguna kami... “ ko indai tuai nyak madah ke punai dalam mimpi ia din...

Punai pan lalu tedani laban ke kena sikul bini ia... peda ia ari pan nyak udah tawas. Ia pan ngerak bini ia ngasuh bini ia berapi. Udah nyak punai pan lalu pansut ke luar laban ke deka ngisap. Datai diluar, tekenyit bendar ia meda utai ke bisi aba depan ia diak. Peda ia semua ramu rumah udah sedia, udai ditusun urang manah-manah, palik ia ke seberai peda umai urang ukai main pemesai-mesai ia gak baru udah tembu di tambak. Punai pan lalu ngagau ke bini ia pansut ke luar.

“santa.... uji pansut kitu dulu nuan, peda nuan utai tok deh...”... ko punai ngagau ke bini ia.

Bini ia pan lalu pansut.

“apooo.... punai... bisi urang enggau tua ditu ney... nama lemai kemari nadai utai nyak deh?... ko bini ia gak nanya punai.

Punai pan lalu nusi mimpi ia demalam ke bini ia. Bini ia enda memunyi. Udah makai pagi nyak punai pan lalu nurun gawa ngentak rumah. Bini ia pan nunlung ia mega. Datai aba endur ke seduai ka begagak ke rumah nyak, peda seduai utai udah sedia magang, tabak ke endur seduai ka berumah nyak pan udah disedia. Udah bisi pala babi diengkah urang aba endur seduai ke deka ngentak ke tiang. Nama deh agi, punai pan lalu berengkah miring laban ke deka neresa tabak endur seduai berumah nyak. Udah tembu miring, punai pan lalu ngentak ke tiang. Besai rumah ke di gagak seduai melaki bini nyak. Sebedau tengah ari perabung rumah pan tembu di gagak punai. Amat lempung pengawa punai sari nyak asai ke bisi urang ke enggau seduai gawa. Semina dinding ajak meh ke bedau digagak punai. Sebedau ia ke makai tengah ari. Udah makai tengah ari nyak, puna pan lalu nyambung pengawa ia baru, bini ia pan baka nyak mega nulung ia gawa. Enda lama peda tembu gak dinding enggau lantai digagak seduai, udah nyak tembu gak geladak tanju enggau ruai. Nyau udah silau meh maya nyak endur rumah nyak tembu manah. Seduai pan lalu pindah malam nyak. Manah endar nalan ke endur seduai diau, laban enda entu jauh ari rumah seduai bisi gak ai wong, ai nyak ke meh dikena seduai mandi, kena bebasu, kena berapi. Sepengelama seduai ke diau diak, seduai pan idup baka urang bukai mega.

Sida apai enggau indai santa ke diau di rantau arau din. Balat amat irau ati ke santa. Mayuh macam cara ke dikena sida ngigak santa enggau punai tang meh ndai berhasil. Bisi nyak madah udah dilelai ke antu kamba, bisi nyak madah udah dibai bunsu telanjing, bisi mega madah udah ditelan nabau. Nadai meh santa enggau punai nyak ko jaku bala sekeda, sigi enda pulai agi, lesi meh seduai ditaban ke raja genali, rebah papah meh seduai labuh ke baruh arung. Piak meh ko leka sebana apai enggau indai santa. Nyadi padi ke ditambak seduai melaki bini di rantau arau, siti nadai meh nyadi. Semua utai ke ditanam seduai, utai ke ditupi seduai mati magang.

Sepengelama seduai ke diau di pulau sengkabang nyak, umai seduai pan nyau tau diketau, seduai melaki bini pan belabuh ngetau. Enda lama seduai ngetau, bisi dalam masa seminggu umai pan tembu diketau. Mayuh amat padi ulih seduai taun nyak bisi ka 300 guni. Bak kuyan padi seduai penuh laban padi, nyau abis di engkah seduai aba sebelah bilik diak. Enti baka lauk nyak seduai melaki bini sigi enda punkang. Pengelama seduai ke nguan menua pulau sengkabang nyak, nyau deka mangai lima tahun, bedau gak bini ia santa bisi tubuh. Taja piak idup seduai enda kala merinsa semua utai bisi magang. diak deh ari siti, santa enda ingat ke penti pemali seduai ke diau diak. Maya nyak ia benung datai indu. Nyadi kain sirat ke udah dikena ia nyak labuh ke baruh rumah. Udah ia ke ngambi kain sirat nyak tadi ia pan lalu nyembui sirat nyak aba tanju lalu enda ingat dibuat ia lemai nyak. Bemalam ditanju diak meh sirat ia nyak malam nyak. Pagi siti baru ia tepeda ke sirat ia nyak agi aba tanju diak. Ia ndai madah ke punai laban enggai ke dianu punai. Endang baka Selama megak nadai ke utai ngacau, utai ngawa ia....

“enda nyata meh mimpi punai enti baka nyak...” ko peragam ati ia din.

Laban ke udah tembu ngetau, ending sigi nadai pengawa bukai urang menua, ia pan nemu ke tikai anyam bebuah ia ke digagak ia sebedau ngetau suba. Nyadi sari nyak punai deka nurun bejalai laban ke deka ngigak tubu. Udah makai pagi nyak, punai pan lalu mupuk nurun ngigak tubu. Amat mayuh tubu maya nyak, nyau bisi ke sepuluh pucuk di gigak punai. Punai pan lalu mulai ke diri ke rumah. Lebuh maya ia mulai ke diri kerumah, punai bisi meda ninga munyi anak mit nyabak di selepak bandir tapang. Dinga ia tak kela-kela munyi utai nyak. Dipending ke ia gak, ia pan lalu nyidi bunyi nyak, makin ia semak bandir tapang nyak makin nyarih gik gak bunyi sabak anak mit nyak. Di pending ke ia baru gak...

“anak sapa ke nyabak aba kampung puang baka tok.... sepengelama aku ke udah nguan menua tok, nadai kala aku bepansa enggau mensia...” ko peragam ati ia din.

Punai pan nyau sesemak agi gik bandir tapang nyak, udah nyak ditilik ia selepak bandir tapang nyak, diak deh punai pan tekenyit, tepeda ke siku anak mit garing-garing gali kebenung nyabak selepak bandir tapang nyak. Manah amat gamal anak mit nyak dipeda ia.

“apoo... anak mensia tok arr.... sapa meh apai indai anak mit tok ke berani endar ngelengka ke anak ke baru ada tok aba kampung baka tok...” ko punai bejaku Kediri.

Nyadi anak mit nyak tadi baru ada amat-amat, agi bisi tali pusat. Punai pan enda camang-camang. Ia pan lalu ngambi anak mit nyak tadi lalu dibai ia pulai. Gaga amai ati punai maya nyak laban ke tetemu ke anak nyak. Nyau ka semak 20 tahun seduai santa jadi tang meh lalu nadai anak.

“gaga amat santa meda anak tok lagi...” ko punai..

Punai pan lalu ninggal ke nalan nyak. Datai di rumah... ia pan lalu ngagau ke bini ia ke benung kisuk manduk buah ubi di dapur din...

“santa.... uji kitu dulu nuan... peda nuan utai ke dibai aku tok.... “ ko punai ngagau ke bini ia.

Santa pan lalu beguai gak ngelawa laki ia ke benung mangku anak mit nyak tadi...

“apuu... punai... dini nuan bulih anak tok?... ko bini ia nanya. Punai pan lalu nusi ke bini ia jerita ia ke bulih anak mit nyak tadi. Udah nyak bini ia pan lalu meri anak mit nyak mandi. Amat manah endar gamal anak mit nyak, ia gak besai amai tampin ia. Gaga meh seduai melaki bini sari nyak laban ke udah bisi anak. Anak nyak pan digagak ke seduai nama Abang. Tang meh siti penyelai ke bisi aba anak mit nyak, anak nyak enggai badu-badu nyabak. Dipanduk ke santa ai asi, enggai gak anak mit nyak nelan ai asi nyak. Nyau semalam-malam meh anak nyak nyabak enggai badu.

“uji tumpil ke tusu nuan nyak enggai abang nyak....” ko punai madah ke bini ia.

“anang ka dadak nuan.... ukai aku tok bisi ai tusu...” ko bini ia gak nyaut punai.

“nai..... uji ke dulu meh.... ni nemu ia ka badu nyabak legi... udah nyak beri di ai asi enti ia udah badu nyabak lagi... kasih ninga ia nyabak nyau enggai badu-badu...” ko punai.

Ninga punai nyau ngansak ia, santa pan lalu numpil ke mulut anak mit nyak gik tusu ia, nyau baka api ke ditanjah ai, anak mit nyak pan lalu badu nyabak. Ia pan lalu ngisap tusu santa, baka anak mit ke ngisap tusu nyak meh. Amat tak baka ke bisi ai tusu gak santa nyak, nyau leguk-leguk anak mit nyak ngisap tusu santa. Udah nyak anak mit nyak pan meleka, ia pan badu nyabak agi. Anak mit nyak pan lalu tinduk.

“ney.... uji ari tdi dik numpil ke ia tusu... enda ke udah badu ia nyabak...” ko punai nganu bini ia. Bini ia enda memunyi laban ke berunding.

“ukai nyak bisi ai tusu aku tok.... baka ni anak mitt ok tau kenyang....” ko peragam ati ia din.

Ia pan micit mulut tusu ia, peda ia ndai gak ai tusu. Malam nyak bisi empat kali anak mit nyak ngisap tusu santa. Ka enda meri anak mit nyak tusu, nyabak gak ia legi, diberi ai asi, enggai gak ia nelan. Sepengelama anak mit nyak begulai enggau seduai, anak mit nyak nadai kala makai utai bukai, alah enda pan tusu santa nyak meh diisap ia. Nyau deka bulih empat bulan meh sepengudah seduai ke ngibun anak mit nyak. Tubuh santa pan nyau bisi kusut, nyau udah enda mesai ia suba. Anak mit nyak pan nyau majak besai nyau udah nemu nuduk Kediri. Sepenglama ke udah baka nyak, santa pan sakit. Irau amai ati punai meda bini ia sakit. Tajak piak, anak mit nyak tadi sigi tetap nusu aba santa. Nyau bisi semak dua minggu meh santa ke sakit. Santa pan lalu parai. Naka meh penusah ati tudah punai tadi ditinggal ke santa.

“sapa meh ke deka magi anak aku tok nusu....” piak ko runding ati ia din.

Sepengudah ke pemarai santa nyak tadi, anak mit nyak pan baka selama mega, enggai badu-badu nyabak ngigak tusu. Punai pan nyau baka urang ke dadak mega dalam rumah nyak, laban ke nadai runding bukai. Ia pan lalu numpil ke mulut anak mit nyak agi tusu ia. Sepi ia asai ke rumpung tusu ia digigit anak mit nyak. Peda ia darah pan ke luar aria bi telih ia nyak tadi. Anak mit majak ngisap tusu ia nyak tadi. Meda baka nyak ia pan lalu meleka ke anak nyak tadi ari ke ngisap tusu ia. Baru ia nemu, anak mit nyak ukai anak mensia, lalu ke tegal pemarai bini ia ke nadai darah agi. Anak nyak tadi pan lalu nyabak laban ke agi deka ngisap darah punai, tang meh dilak ke punai piak ajak. Pagi siti punai pan lalu nganjung anak mit aba endur ia nemu anak mit nyak suba. Tang meh anak mit nyak enggai Melaka ari ia.

“baka ni meh cara aku ngau anak tok.... ukai dik tok anak mensia, akan antu dik tok...” ko punai bejaku pedis ati. Ia pan lalu nyintak duku, lalu dipepat ia tubuh anak mit nyak tadi, ngambi ia berani ngagak anak mit nyak baka nyak laban ati ia udah kelalu ransing ketegal pemarai bini ia. Tang meh kerat anak mit nyak tadi enda mati, kerat nyak lalu idup, lalu ngerayap sebelah tanah. Meda utai baka nyak punai pan lalu nyurut ke diri.

“apuu... nama utai ke baka tok.... “ ko ia.

Dipepat ia mit agi kerat nyak tadi, makin mayuh gak kerat anak mit nyak ngerayap sebelah tanah. Meda utai baka ngeyelai nyak ia pan lalu ngelari Kediri, mulai ke diri ke rumah ia. Datai dirumah ia pan lalu ninduk ke diri sampai ke malam, makai pan ia enda laban ke kelalu tusah ati ke pemarai bini ia. Diak deh ia pan lalu bemimpi malam nyak. mimpi betemu enggau bini ia.

“punai... nuan anang kelalu balat tusah ati.... laban aku tetap bini ngerimbai nuan berari. Nyadi lama aku udah ka madah kenuan utai tok, tang meh aku enda kempang... anak ke dikembuan tua ngelama tok ukai anak mensia, tang meh nyak anak bunsu nyemetak... “ ko mimpi punai.

Punai pan lalu tedani. Pagi nyak punai pan berunding deka ninggal ke rumah nyak lalu bejalai sebelah kampung nyak ngigak alai endur diau baru, laban balat tusah ari ia meda utai ke digagak bini ia. Baka tikai, ragak, sintung. Punai pan lalu ningal ke rumah nyak, ia bejalai neresa kampung punang nyak ke ulu kin gik. Nyau udah datai seminggu meh punai ke bejalai neresa kampung nyak, ia tok tadi bejalai nadai nemu kini ke tuju ia. Diak deh ia pan ngetu aba selepak bandir laban ke udah lelak bejalai. Maya nyak nyau ka sumba silau, diak deh ia tak bisi nyium utai bau renggut... ia pan lalu bediri, lalu nyidu bau nyak tadi. Sepengelama ia ke nyidi bau nyak, ia pan tepeda ke siku indu ...



~bersambung...~

No comments:

Post a Comment

Post a Comment